Bir qrup britaniyalı alim süni intellektdən istifadə edərək infarkt diaqnozunun dəqiqliyini artıran və yalançı pozitivlərin sayını azaldan alqoritm hazırlayıb.

Aztibb.az xəbər verir ki, bununla bağlı “Nature Medicine” jurnalında yazı dərc olunub.

Yeni ixtira tibb müəssisələrində həkimlərin işini optimallaşdırmağa kömək edəcək ki, bu da onların diqqətini təcili yardıma ehtiyacı olan xəstələrə yönəltməyə imkan verəcək.

Alqoritm altı ölkədə 10 000 xəstə üzərində sınaqdan keçirilib və 99,6 faiz dəqiqlik götərib.

Miokard infarktının markerlərindən biri ürək hüceyrələri öldüyü zaman qanda görünən protein troponindir. Ancaq bəzi xəstələrdə, əsasən qadınlarda, infarkt zamanı bu zülalın səviyyəsi atipik olaraq aşağı səviyyədədir.

Tədqiqatın müəllifləri CoDE-ACS süni intellekt texnologiyasından istifadə edərək problemin həllini tapıblar. Süni intellekt müxtəlif amilləri – təkcə troponin səviyyələri deyil, həm də insanların bir sıra fərdi xüsusiyyətlərini nəzərdən keçirib. Xüsusilə, EKQ nəticələri, tədqiqat iştirakçılarının anamnezi (tibbi tarixçəsi), cinsi və yaşı nəzərə alınıb.

Qeyd edilib ki, belə geniş siyahı infarkt diaqnozunun dəqiqliyini artırır.