Psixi sağlamlığımız birbaşa ürək-damar sisteminin vəziyyətindən asılı ola bilər. Eyni zamanda, hipertoniya diaqnozundan əvvəl və sonra tamamilə fərqli olur.

Aztibb.az doctorpiter.ru-ya istinadən xəbər verir ki, bir qrup alim Leypsiqdəki Maks Plank İnstitutunda (MPI CBS) yüksək qan təzyiqinin insan psixikasına necə təsir etdiyini öyrənməyə qərar verib.

Bundan əlavə, tədqiqatçılar hipertoniya diaqnozu qoyulanların beyin fəaliyyətinin əziyyət çəkib-çəkməməsi ilə maraqlanıblar.

Təcrübədə orta yaşı 60 olan 500 min insan iştirak edib. Bütün tibbi məlumatları dəqiq şəkildə sistemləşdirmək üçün alimlər maşın hesablama metodundan istifadə ediblər. Bütün məlumatlar Britaniya Biobankından götürülüb.

Araşdırmanın nəticələri maraqlı və hətta gözlənilməz olub. Məlum olub ki, yüksək qan təzyiqi (sistolik) olan insanlar depressiya, narahatlıq, əhval dəyişikliyi və digər psixi pozğunluqlardan daha az əziyyət çəkirlər. Üstəlik, beyin fəaliyyətində də (məlumatı qəbul etmək və emal etmək qabiliyyəti) narahatlıq görülməyib.

Yüksək qan təzyiqinin insanın psixi vəziyyətini yaxşılaşdıra bilməsini alimlər belə izah ediblər ki, bu, fiziki ağrı və stressin qəbulunu əhəmiyyətli dərəcədə azaldır. Beyin təzyiqin yüksəlməsinə alışır, buna görə də insanın ağrı həddi dəyişir.