Anemiya qanda kifayət qədər sağlam qırmızı qan hüceyrəsi və ya hemoqlobin olmadığı zaman meydana gələn bir vəziyyətdir. Hemoqlobin oksigenin daşınmasından məsul olan qırmızı qan hüceyrələrində olan bir molekuldur.

Aztibb.az–a müsahibəsində uzman pediatr, neonatoloq Kamil Şərifov bildirib ki, anemiya simptomları bədəndə çox az və ya anormal qırmızı qan hüceyrəsi olduqda və ya hemoqlobin quruluşunda olan anomaliyalar və hemoqlobin miqdarının az olması zamanı ortaya çıxır.

Bədənin toxumalarına kifayət qədər oksigen gəlməməsi nəticəsində yorğunluq və zəiflik kimi anemiya simptomları inkişaf edir.

Anemiya səbəbləri nələrdir?

Orqanizmin həyatda qala bilməsi üçün qırmızı qan hüceyrələrinə ehtiyacı var. Qırmızı qan hüceyrələrində tərkibində dəmir molekullarını daşıyan kompleks protein olan hemoqlobin olur.

Hemoqlobin molekulları oksigeni ağ ciyərdən bədənin digər hissəsinə daşıyır. Anemiya qanda kifayət qədər qırmızı qan hüceyrəsi olmadıqda meydana gəlir. Bəzi xəstəliklər və vəziyyətlər qırmızı qan hüceyrələrinin sayında azalmaya səbəb ola bilər. Anemiyanın bir çox növü vardır və bunun səbəbi tək deyil.