İnsulin mədəaltı vəzidən ifraz olunan hormondur və I tip şəkərli diabetlilərdə insulin çatışmazlığı olduğu üçün onun istifadəsi həyati əhəmiyyət daşıyır.

Aztibb.az xəbər verir ki, endokrinoloq Rəhilə Mansurun sözlərinə görə, tez-tez pasientlər tərəfindən insulinin asılılıq yaratdığı, zərərli olduğu haqqında fikirlər səslənir. Daha çox tablet istifadə edən, zəruri hallarda insulin müalicəsinə başlanılan II tip diabetli xəstələrdən bu kimi iddialar eşidirik.

Lakin aparılan araşdırmalara və elmi statistikalara görə, II tip diabetlilərin 75%-i insulin müalicəsi alır. Çünki şəkərli diabet xəstəliyi proqressiv inkişaf edən və xroniki bir xəstəlikdir.Vaxt keçdikcə istifadə olunan şəkərsalıcı (əsasən insulin ifraz etdirici) həbləri ən yüksək dozada istifadə etsəniz də artıq qan şəkərini normallaşdırmağa bu kifayət etmir. Bu halda insulin müalicəsinə başlanmaq şərtdir.

Həmçinin, aşağıdakı hallarda II tip şəkərli diabet diaqnozu qoyulan xəstələrdə insulin müalicəsinə keçmək tövsiyə olunur:

- 3 aylıq şəkərin (HbA1C) 10% və qlükozanın 300 mg/dl üzərində olması;
- Böyük həcmli cərrahi əməliyyatlar
- Ciddi qaraciyər və böyrək çatmazlığı
- Kəskin infeksion proseslər
- Diet ilə nəzarət edilə bilinməyən hamiləlik diabeti.
- Düşünülənin əksinə lazım olduğu hallarda insulinlərin istifadə edilməməsi orqanizmə daha çox zərər vura bilər.

Qeyd edilən hallar aradan qalxdıqdan sonra insulin istifadəsini dayandırmaq və yenidən tablet müalicəsinə başlamaq olar.