Tehran Tibb Elmləri Universitetinin mütəxəssisləri qidalanma növünün yeniyetmələrin xarakterinə təsiri ilə bağlı araşdırma aparıblar.

Aztibb.az xarici mediaya istinadən xəbər verir ki, tədqiqata cəlb olunan iştirakçılar 12-18 yaşlı 670 qız olub. Onların arasında yemək seçimləri, xarakter keyfiyyətləri, emosionallıq səviyyəsi barədə anket sorğusu aparılıb.

Tədqiqatçıların məqsədi iştirakçıların aqressivlik səviyyəsini müəyyən etmək və onu pəhrizin müəyyən xüsusiyyətləri ilə əlaqələndirmək idi.

Mütəxəssislər üç növ qidalanma müəyyən ediblər: “Qərb pəhrizi”, sağlam qida və fast food. Məlum olub ki, ən yüksək aqressiya birincidən sonra özünü göstərib.

Qərb pəhrizi nədir? Bu çoxlu qırmızı ət, sənaye şirələri, hər cür desertlərdir. Bu cür qidaların aqressivliyin artmasına tam olaraq necə təsir etməsi gələcəkdə də tədqiqat obyekti olacaq. Ancaq ilkin təsir aydındır.

Ət yeməklərinə üstünlük verilməsinə gəldikdə, onların artan aqressivliyə dair proqnozu barədə əvvəllər də fikir irəli sürülüb. Müəlliflər ümid edirlər ki, pəhrizi tənzimləməklə yeniyetmələrin aqressivliyinə təsir göstərməyə kömək edəcək daha ətraflı məlumat əldə ediləcək.

Tədqiqatın nəticələri “Brain and Behavior” jurnalında dərc edilib.