Kaliforniya Universitetinin tədqiqatçıları tərəfindən aparılan yeni bir araşdırmaya görə, 30 yaşlarında insanlarda yüksək qan təzyiqi beyin sağlamlığının pisləşməsi ilə əlaqələndirilir. Bu xüsusilə kişilərə aiddir.

Aztibb.az ridus.ru-ya istinadən xəbər verir ki, tədqiqatda iki qrupa bölünən 427 yaşlı insan iştirak edib. Birinci qrupdan olan 30-40 yaş arası könüllülərdə yüksək qan təzyiqi, ikinci qrupda isə o yaşda normal təzyiqi olanlar olub. Mütəxəssislər bütün iştirakçıların sağlamlıq məlumatlarını diqqətlə öyrəniblər. Həmçinin, MRT müayinəsi aparılıb, bu da onlara sonrakı yaşlarda neyrodegenerasiyanın biomarkerlərini tapmağa imkan verib.

“JAMA Network Open” jurnalında dərc edilən nəticələr göstərib ki, 30 yaşında hipertoniya beynin boz maddə həcminin aşağı olması, ağ maddənin daha zəif bütövlüyü və daha kiçik frontal lob həcmi ilə əlaqələndirilir. Yüksək qan təzyiqi olan kişilərdə bütün göstəricilər qadınlardan daha aşağı olub. Tədqiqatçılar bu fərqlərin estrogenin qoruyucu xüsusiyyətləri ilə bağlı ola biləcəyini irəli sürüblər.

“Yüksək qan təzyiqi idrak qabiliyyətinin zəifləməsi və demansla əlaqəli olsa da ümumi və müalicə edilə bilən risk faktorudur. Bu araşdırma göstərir ki, erkən yetkinlik dövründə təzyiqə diqqət yetirmək gələcək beyin sağlamlığı üçün çox vacibdir”, – deyə tədqiqatın aparıcı müəllifi Kristen Corc bildirib.