Trapezius əzələsi stres, gərginlik, narahatlıq və depressiv vəziyyətlərdə asanlıqla gərginləşən və ağrıya səbəb olan əzələlərdən biridir. Trapezius bədənimizdəki əsas əzələlərdən biri kimi çiyinlərimizə, boynumuza və yuxarı-orta kürək nahiyyəsinə yapışır.
Aztibb.az xəbər verir ki, uzman fizioterapevt Rüfət Cabbarlı orqanizmdə mühüm əhəmiyyətə malik trapezius əzələsi və onun funksiyası haqqında məlumat verib.
"Bu əzələ kürək nahiyəmizin ən səthi əzələsidir. Üst, orta və aşağı trapezius olmaqla 3 hissəyə bölünür. Trapezius əzələsi kürək sümüyünün hərəkətlərindən məsuldur",- həkim bildirib.
Qeyd edib ki, düzgün duruş üçün trapezius əzələsinin sağlamlığı çox vacibdir. Əzələnin güclü və çevik olması, tətik nöqtələri və spazmların olmaması, sağlam dayaq-hərəkət sistemi və ağrısız bir həyat üçün vacibdir.
Həmçinin əlavə edib ki, fizioterapevtik proseduralar və müalicəvi idmanlar bu əzələnin problemlərinin müalicəsində çox uğurlu nəticələr verir.