AST (Aspartat aminotransferaza) qaraciyər zədələnməsinin və bir çox qaraciyər xəstəliyinin diaqnozunun qoyulması üçün aparılan biokimyəvi labaratoriya analizidir.
Aztibb.az xəbər verir ki, hepatoloq Tofiq Əkbərovun bildirdiyinə görə, tək başına klinik bir məna ifadə etməyən AST, Alanin Aminotransferaza (ALT) ilə birlikdə yoxlanılır. Hər iki analizin nisbəti hesablanaraq qaraciyər zədələnməsinin dəyərləndirilməsində və qaraciyər xəstəliklərinin diaqnozunun qoyulmasında istifadə olunur.
Həkim qeyd edib ki, Aspartat Aminotransferazın qanda miqdarının çox olması, qaraciyər zədələnməsi və xəstəlikləri başda olmaqla,AST fermenti mövcud olan ürək, beyin, böyrək və əzələlərinin zədələnməsinin də əlaməti ola bilər. Bəzi hallarda qaraciyərin həddindən artıq yükləndiyini göstərən yüksək AST, insanın həddindən artıq zəhərli maddələrin təsirlərə məruz qaldığını da göstərə bilər.
Hepatoloq AST testinin hansı hallarda edilə biləcəyini də deyib:
Hepatit virusların ilə xəstələnmə;
Həddindən artıq spirtli içki istifadəsi;
Qaraciyər üçün toksiki təsiri ola biləcək dərman istifadəsi zamanı;
Ailənizdə qaraciyər xəstəliyi varsa;
Artıq çəkidən əziyyət çəkirsinizsə;
Diabet və ya metabolik sindromunuz varsa;
Qaraciyər piylənmə;
Sarılıq;
Davamlı yorğunluq;
Qeyri-adi zəiflik;
Qarın şişməsi;
Qarın ağrısı;
İştahsızlıq;
Dəridə qaşınma;
Tünd sidik;
Ürək bulanması;
Baldırda, ayaq biləklərində şişkinlik və s.
“AST analizi 8-14 saat gecə aclığından sonra verilməlidir. Heç bir narahatlıq hiss etməyən şəxslər belə ildə 1 dəfə ALT və AST analizlərini verməlidir. Sağlamlığnızı qorumaq üçün rutin olaraq müayinələrdən keçmək mütləqdir”, – həkim tövsiyə edib.