Ümumdünya Meteorologiya Günü 1961-ci ildən etibarən təqvimə salınıb. Hər il martın 23-də aktiv mövzular ətrafında konfranslar, aksiyalar, maarifləndirmə tədbirləri keçirilir. Bu günü qeyd etməkdə məqsəd əhalinin sağlamlığının təminində meteorologiya və meteoroloji xidmətin mühümlüyünə diqqəti cəlb etmək, bəşəriyyətin üzləşdiyi ən ciddi problemlərdən biri olan iqlim dəyişikliklərinə, onların səbəb və nəticələrinə, o cümlədən qarşısının alınmasına fikri yönəltməkdir.
Aztibb.az eco.gov.az-a istinadən xəbər verir ki, iqlim dəyişikliyi nəticəsində dünyanın bir çox yerlərində hava, iqlim və su ekstremalları getdikcə daha intensiv xarakter almaqdadır.
Milli meteoroloji və hidroloji xidmətlər, fəlakətlərin idarə edilməsi orqanları və inkişaf agentlikləri arasında koordinasiyalı işin daha yaxşı qurulması preventiv, hazırlıq və cavab tədbirləri üçün əsasdır. Hazırlıqlı olmaq və lazımi anda, doğru yerdə hərəkət edə bilmək bir çox insanın həyatını xilas edə, həm indi, həm də gələcəkdə icmaların dolanışıq vasitələrini qoruya bilər. Bu il günün mövzusu da məhz fəlakət riskinin azaldılması üçün hidrometeoroloji məlumatların həyati əhəmiyyətini vurğulayır.
