Novruzun adətlərindən biri olan bayram tonqalları təhlükəsiz ötüşmür.

Bayram ərəfəsi Novruz tonqalından tullanarkən yıxılaraq müxtəlif bədən xəsarətləri alanlar çox olur.

Aztibb.az xəbər verir ki, bu cür xoşagəlməz hadisələr əksər hallarda tonqal qalayarkən də təhlükəsizlik tədbirlərinə riayət olunmaması səbəbindən baş verir.

Ekspertlər tövsiyə edir ki, ilk növbədə azyaşlıları yanan tonqal ətrafında nəzarətsiz qoymaq olmaz. Tonqalın ətrafında, insanların çox olduğu yerdə uşaqların da olmasını nəzərə alaraq partlayıcılardan, fişənglərdən, pirotexniki vasitələrdən istifadə etmək edilməməlidir.

Həmçinin tonqalı yandıracaq yeri düzgün seçilməlidir. Həmin ərazi tezalışan materiallar, maşın, elektrik şitləri və evlərə çox yaxın olmamalıdır. Daha sonra tonqalın hündürlüyünə diqqət etmək lazımdır. Tonqalın hündürlüyü 1.5 metrdən hündür olmamalı, asfalt və ya beton örtüyünün üstünə dəmir qoruyucu qoyulmaqla yandırılmalıdır. Bu, həm zəif küləkli havada belə közün ətrafa yayılmasının, həm də asfalt örtüyünün korlanmasının qarşısını alır.

Yaxşı olar ki, üzərində boya və ya müxtəlif madəllər çəkilmiş taxta parçaları, plastmas və kauçukdan olan bəzək əşyaları, rezin, sellofan, maşın şini kimi materiallardan tonqalda istifadə edilməsin. Çünki yanma zamanı onlardan ayrılan tüstü toksiki xarakter daşıyır və zəhərlənməyə səbəb ola bilər.

Əyləncə bitdikdən sonra isə odun tam söndüyünə əmin olmaq lazımdır. Əks halda külək odu ətrafa yayar və yanğın təhlükəsi yaradar.