Bədən kütlə indeksi 30-dan artıq olan insanlar piylənmə mərhələsində hesab olunur. Bəs hansı halda əməliyyat uyğun bilinir?

Aztibb.az xəbər verir ki, ümumi cərrah Toğrul Məhərrəmov bu barədə "Instagram" səhifəsində məlumat paylaşıb.
 
Həkim bildirib ki, çəkinin boyun kvadratına bölünməsi ilə əldə olunan rəqəm bədən kütlə indeksi sayılır. Bədən kütlə indeksi 20-25 arasında olan insan normal, 25-30 arasında olan artıq çəkili (kökəlmiş), 30-35 I dərəcə, 35-40 II dərəcə, 40-dan çox isə aşırı piylənmə mərhələsindədir.

Əgər insanda bir sıra xəstəliklər, məsələn, şəkərli diabet, yüksək təzyiq varsa və indeks 40-dan artıqdırsa buna "ölümcül artıq çəki" deyilir.

Həkim qeyd edib ki, belə olduqda bariatrik əməliyyat aşağıdakı xəstələr üçün uyğundur:

-bədən kütlə indeksi 40-dan çox olan xəstələr,
-bədən kütlə indeksi 35-dən çox olub, yanaşı xəstəliyi olanlar,
-1 illik pəhriz, dərman müalicəsi və nizamlı fiziki fəaliyyətə baxmayaraq kilo verə bilməyənlər.