Çimməyin tezliyinin xəstəliklərin inkişaf riskinə təsir göstərdiyi bir daha müəyyən olunub. Yapon alimi Şinya Hayasaka iddia edir ki, 40-50 yaş arası insanların gündəlik çimməsi miokard infarktı və insult riskini xeyli azaldır. 

Aztibb.az live24.ru-ya istinadən xəbər verir ki, yapon həkimləri bir neçə il ərzində 40-50 yaşlı 30 minə yaxın insanın həyat tərzini izləyib və müəyyən ediblər ki, hər gün vanna qəbul etmək insult və miokard infarktının qarşısını alır. 

Daha bir müşahidə üç il ərzində 65 yaşdan yuxarı on dörd min nəfər üçün aparılıb. Nəticə göstərib ki, hər gün vanna qəbul edənlərin sağlamlıq problemləri riski həftədə iki dəfədən az vanna qəbul edənlərlə müqayisədə demək olar ki, otuz faiz aşağıdır. 

Ş.Hayasaka bildirib ki, hamamda suyun temperaturu 40 dərəcə olmalıdır, düş və ya vanna qəbulunun optimal müddəti on dəqiqədir. Həkim bədəni hər dəfə sabun və ya gel ilə süngərlə sürtməyi məsləhət görmür. Sadəcə sabunu əllərinizlə köpürtmək və bədəninizi yumaq lazımdır. Prosedurdan əvvəl və sonra bir-iki stəkan su içməklə su balansını qorumaq məsləhətdir.