Zəlzələnin nəticələrini əvvəlcədən görə bilmədiyimiz üçün hadisələrin qorxu hissimizi tətikləməsi olduqca təbiidir. 

Aztibb.az cumhuriyet.com.tr-yə istinadən xəbər verir ki, "seysmofobiya" olaraq da bilinən zəlzələ qorxusu ölüm və itki qorxusu ilə əlaqələndirilir.  

Bir çox digər fobiyalarda təhlükə elementi öz həyatımızla bağlı qarşılaşdığımız vəziyyətlər olsa da, burada təhlükə elementi ailəmizi və yaxın ətrafımızı itirmək ehtimalı ilə bağlıdır. 

Zəlzələyə meyilli ərazilərdə yaşayan insanlarda zəlzələ qorxusu daha çox olur. Seysmofobik insanların əksəriyyətində qorxu keçmişdə baş vermiş dəhşətli zəlzələ təcrübəsindən qaynaqlanır. Bu, insanda ömürlük seysmofobiyaya səbəb ola bilər. 

İnsanların günlərlə, hətta həftələrlə dağıntılar altında qaldığı zəlzələlərlə bağlı xəbərləri oxuyuruq və ya eşidirik. Bu hal da təbii olaraq narahat insanlarda zəlzələ qorxusunun yaranmasına səbəb ola bilər. 

Bəzi davranışlar insanlarda seysmofobiyanın əlamətlərini göstərir. Bunlar arasında zəlzələdən bir neçə həftə sonra daimi qorxunun yaşanması, sosiallaşmaq istəyinin aşağı olması səbəbindən təcrid, hadisə haqqında təkrarlanan fikirlər və s. əlamətlər var.