Xəstəliyə səbəb olan bakteriyaların antibiotiklərə qarşı müqaviməti çox vaxt antibiotiklərin həddindən artıq istifadəsi ilə əlaqələndirilsə də, tədqiqatçılar antidepresantların istifadəsinin müqavimətə səbəb ola biləcəyini aşkar ediblər.
Aztibb.az t24.com.tr-yə istinadən xəbər verir ki, tədqiqatın hesabatını verən nature.com-un məlumatına görə, antibiotiklərə qarşı müqavimət qlobal sağlamlıq təhlükəsidir. 2019-cu ildə 1,2 milyon insanın birbaşa antibiotik müqaviməti nəticəsində öldüyü təxmin edilir.
Bildirilir ki, dünyada ən çox istifadə edilən dərmanlardan biri olan antidepresantlar bəzi bakteriyaları öldürür, bəzilərinin isə inkişafına təsir edir. Bir qisim bakteriyalar müdafiə mexanizmini işə salır və beləliklə, həmin bakteriyalar antibiotik müalicəsinə baxmayaraq yaşaya bilir.
Araşdırmada mikrobun antidepresanlara məruz qalması ilə mutasiya nisbətinin artdığı da müşahidə edilib.