Sidneydə keçirilən konfransda çıxış edən “Microsoft”un qurucusu, milyarder Bill Qeyts dünyanı gözləyən yeni təhlükə barədə xəbərdarlıq edib.
Aztibb.az-ın medimagazin.com.tr-yə istinadən xəbərinə görə, B.Qeyts növbəti pandemiyanın insan tərəfindən yaradılacağını və koronavirusdan daha qəddar ola biləcəyini söyləyib.
Dünya liderlərinin fikir ayrılıqlarını bir kənara qoyub hazırlığa indidən başlamalı olduğunu deyən milyarder sözügedən ssenarinin reallaşacağı təqdirdə dünyaya iqtisadi baxımdan 10 trilyon dollardan çox ziyan dəyəcəyini bildirib.
Zəruri addımların atıldığı təqdirdə yeni bir pandemiyanın qarşısının alına biləcəyini söyləyən Qeyts, qlobal epidemiyaya qarşı reaksiya və səfərbərlik üçün yaradılan GERM qrupuna ildə 1 milyard dollar sərmayə qoyacağını açıqlayıb. Bu sərmayəyə əlavə olaraq, Qeytsin planına dünyada diaqnostika və səhiyyə sistemləri üçün Ar-Ge-yə dəstək də daxildir.
