Alimlər xəbərdarlıq edirlər ki, XBB.1.5 adlı yeni variant koronavirusun əvvəlki variantlarına nisbətən daha asan yoluxur. Eyni zamanda, koronavirusa qarşı peyvənd olunan insanları da yoluxdura bilir.
Aztibb.az xarici KİV-lərə istinadla xəbər verir ki, mütəxəssislər XBB.1.5 variantının dünya səhiyyə sisteminə təzyiq göstərə biləcəyini deyirlər. Bununla belə, yeni variantın əvvəlki variantlardan daha ciddi xəstəliklərə səbəb olduğuna dair hələ heç bir dəlil yoxdur.
XBB.1.5 ştamı mutasiyaya uğramış variantdır. Böyük Britaniyada dekabrın 10-dan 17-dək koronavirusa yoluxanların 4 faizində XBB.1.5 ştamı təsdiqlənib.
Mütəxəssislər bildirirlər ki, XBB.1.5 “Omicron XBB”nin mutasiya edilmiş versiyasıdır və ilk dəfə avqust ayında Hindistanda aşkarlanıb.
BJ.1 və BA.2.75 variantlarının kombinasiyası olan XBB cəmi bir ay ərzində bəzi ölkələrdə yoluxma hallarını dörd dəfə artırıb.
Varvik Universitetinin virusoloqu, professor Lourens Yanq bildirib ki, “XBB.1.5 variantı çox yoluxucudur və xüsusən də yaşlılar arasında xəstəxanaya yerləşdirmə sayının artmasına səbəb olur. İmmunitetin azalması, soyuq hava səbəbindən daha çox evdə olmaq, eləcə də tibbi maskaları taxmamaq infeksiyaların artmasına kömək edir”.
XBB.1.5-ə yoluxma halları ən azı 74 ölkədə təsdiqlənib. Bu ölkələrə Türkiyə, İngiltərə, Çin, Hindistan, Pakistan, İndoneziya və Avstraliya daxildir.
Mütəxəssislər XBB.1.5 variantının simptomlarının digər “Omicron” variantlarına bənzədiyini bildirirlər və simptomları aşağıdakı kimi sıralayırlar:
- Öskürək
- Soyuqdəymə simptomları
- Qızdırma
- Boğaz ağrısı
- Bədən ağrıları.