2020-ci ilin 27 sentyabrında başlanan Vətən müharibəsi Zəfərlə başa çatdı. Qazanılmış qələbədə müzəffər Azərbaycan Ordusu ilə yanaşı, onların sağlamlığının keşiyində dayanan həkimlərin də böyük rolu olub. Qürurvericidir ki, bu Zəfər səhiyyəmizin də yüksək səviyyədə qurulduğunun təsdiqi oldu.

Aztibb.az xəbər verir ki, bu fikirləri Nərimanov Tibb Mərkəzinin həkim-pediatrı Sevil Orucova söyləyib.

Onun sözlərinə görə, Nərimanov Tibb Mərkəzinin əməkdaşları direktor, t.ü.f.d. Fazil Alməmmədovun rəhbərliyi ilə öz cəbhəsində əsgər olub, hər biri ayrı-ayrılıqda özü boyda qələbə bayrağına çevrilərək qalibiyyətin, zəfərin müjdəçisinə çevrildi. Nərimanov Tibb Mərkəzinin təhkim olunduğu Şuşa Modul tipli Xəstəxanada həkimlərimizin göstərdiyi xidmətdən fəxrlə danışa bilərik. Şuşa Modul tipli Xəstəxanada həkimlərimiz canla-başla dədə-baba torpaqlarından uzaq düşmüş vətəndaşlarımıza, öz doğma yurdlarına qayıtması prosesində yaxından iştirak edən şəxslərə yüksək keyfiyyətlə tibbi xidmət göstərirlər.

Sevil Orucova qeyd edib ki, müasir dövrdə müharibələr yalnız siyasi-inzibati sərhəddə getmir və əsgər olmağın tək yolu əlinə avtomat alıb döyüş bölgəsinə getmək deyil. Müharibə şəraitində olan dövlətimizdə, erməni ilə müharibədə qalibiyyət üçün hər kəs öz sahəsi üzrə mübarizəyə qalxdı, bütün fəaliyyət sahələri cəbhəyə çevrildi. hər kəs öz cəbhəsində əsgər oldu və hər cəbhənin də öz savaş metodları var.

"Müharibədə döyüşənlərlə eyni səngərdə olmaq, ehtiyacı olan döyüşçünün imdadına çatmaq, yaralı əsgər və zabitlərimizi, qazilərimizi sağlamlığına qovuşdurmaq da döyüşməkdir. Səhiyyəmiz də döyüşdü, bu Zəfər həm də səhiyyəmizin zəfəridir", - deyə həkim bildirib.