Həftə ərzində (3-9 oktyabr) dünyada təxminən 2,9 milyon insan koronavirus infeksiyasına yoluxub, 9 mindən çox insan isə xəstəlik səbəbindən ölüb. 

Aztibb.az Ümumdünya Səhiyyə Təşkilatının (ÜST) həftəlik bülleteninə istinadla xəbər verir ki, ötən yeddi gün ilə müqayisədə yoluxma hallarının sayı 10 faiz, ölüm hallarının sayı isə 1 faiz azalıb.

Yoluxma hallarında əhəmiyyətli dərəcədə azalma Afrika (41 faiz), Cənub-Şərqi Asiya (25 faiz) və Qərbi-Sakit Okean regionunda (21 faiz) qeydə alınıb. Avropada yoluxma hallarının sayı 3 faiz, Amerikada – 10 faiz azalıb. Ölüm hallarının sayı Afrika (53 faiz), Cənub-Şərqi Asiya (23 faiz) və Avropada (12 faiz) azalıb. Bununla belə ölüm hallarının sayı Amerika (11 faiz) və Qərbi-Sakit Okean regionunda (1 faiz) artıb.

Almaniya həftə ərzində ən çox - 508 749 yoluxma halı barədə məlumat verib. Ondan sonra Çin (333 830), Fransa (323 787), ABŞ (283 220) və İtaliya (280 947) qərarlaşıb. ABŞ-da yeddi gün ərzində ən çox - 2 817 ölüm halı qeydə alınıb. Daha sonra Braziliya (767), Rusiya (731), Yaponiya (567) və Çin (412) yer alıblar.

Oktyabrın 12-nə olan məlumata görə, ÜST-yə pandemiya başlayandan bəri koronavirusa 619 770 633 yoluxma halı və 6 539 058 ölüm halı barədə məlumat daxil olub.