Pandemiya şəraitində COVID-19 xəstəliyinin diaqnostikasında “Chest X-ray” şəkilləri (Döş qəfəsinin rentgenoqrafiyası) mühüm rol oynayır. Lakin tibbi şəkil təsvirlərində COVID-19 xəstəliyinin neqativ və ya pozitiv olmasını müəyyən etməkdə başlıca problemlərdən biri klassifikasiya modellərinin səhv aşkarlama xətalarına çox yol vermələridir.

“COVID-19 pandemiyası şəraitində ağciyərlərdə pnevmoniyanın diaqnostikası üçün effektiv ansambl təlim üsullarının işlənməsi” (Diagnosis of pneumonia in the lungs in the conditions of the COVID-19 pandemic using ensemble learning methods) adlı məqalədə bu barədə məlumat verilib.

İnformasiya Texnologiyaları İnstitutunun aparıcı elmi işçisi, texnika üzrə fəlsəfə doktoru, dosent Fərqanə Abdullayevanın və institutun doktorantı Süleyman Süleymanzadənin həmmüəllifi olduqları məqalə İsveçrənin “International Journal of Reasoning-based Intelligent Systems” jurnalında dərc olunub.

İnstitutdan Aztibb.az-a bildirilib ki, tədqiqat çərçivəsində COVID-19 xəstəliyi üzrə “Chest X-ray” şəkil təsvirlərini uyğun COVID-19 və normal siniflərə dəqiq təyin edə bilən sistem təklif edilib.
Məqalə “E-sosiotexnoloji mühitlərdə Big Data resurslarının menecmenti, e-demoqrafiyanın formalaşması və intellektual analizi texnologiyalarının işlənilməsi” layihəsi çərçivəsində aparılmış elmi tədqiqatlar əsasında hazırlanıb.