AMEA-nın vitse-prezidenti, Molekulyar Biologiya və Biotexnologiyalar İnstitutunun baş direktoru akademik İradə Hüseynova, biologiya üzrə fəlsəfə doktoru Samirə Rüstəmova və Gülnar Abdullayevanın həmmüəllifi olduqları “Buğdanın yaranma mərkəzindən olan diploid əcdad növlərdən DREB geninin ayrılması və xarakterizə edilməsi” adlı məqalə “Genetics and Molecular Research” jurnalında çap edilib.
Bu barədə Aztibb.az-a institutdan məlumat verilib.
Bildirilib ki, Azərbaycanın yumşaq buğdanın ilkin yaranma mərkəzi olması ilə bağlı olaraq məqalə müasir buğdaların genom donorları olan yerli yabanı diploid buğdalardan stresə davamlılıqda əsas rol oynayan DREB transkripsiya faktorunun geninin tədqiqinə həsr olunub. Gen yabanı buğdalardan izolyasiya olunaraq sekvens edilib və in silico analizlər aparılıb. Sekvens analizin nəticələri NCBI beynəlxalq məlumat bazasına daxil edilib və MZ935739 və MZ935740 qeydiyyat nömrələri altında yerləşdirilib.
Tədqiqat AMEA Rəyasət Heyətinin və Azərbaycan Respublikasının Prezidenti yanında Elmin İnkişafı Fondunun maliyyə dəstəyi ilə həyata keçirilib.
