Aztibb.az xəbər verir ki, pediatr-neanotoloq Nurəngiz Hacıyeva bildirib ki, uşağın həyatına səhər yeməyi və şorbalar daxil olmağa başlayanda qidalar həmcins olmalıdır, çəngəllə əzilməlidir. Bu, uşağın çeynəmə və udma bacarıqları əldə etməsi üçün vacibdir. Əks halda, daima blenderlə üyüdülmüş qidalar yeyən uşaqlarda "Blender Babies" formalaşmağa başlayır. Uşağı ilk gündən necə qidalandırmağa başlasaq, elə də davam edəcək:

 

"Daim hamar qidalar versəniz, çənə əzələlərini gücləndirməyi, damağı ilə əzməyi, dili ilə çevirməyi öyrənə bilməz. Gələcəkdə o, ən kiçik bərk şeyi yeməkdən imtina edəcək və qusacaq. Tədricən vitamin azlığı və qan azlığı inkişaf edəcək. 8 aydan xırda doğranmış qidaları yedikcə, uşaq özü qidanı götürməyə başlayacaq, bununla incə motorika bacarıqları inkişaf edəcək. Qidaları çeynəmək nitqin inkişafı üçün də vacibdir".

 

Həkim onu da bildirib ki, davamlı olaraq blender ilə üyüdülmüş yemək yeyən uşaqlar diri-diri yeməkləri yeməyi öyrənməkdə çətinlik çəkirlər. Blender uşaq bağçaya başlayanda və ya müxtəlif sosial mühitlərə daxil olduqda yemək problemi yaradır. Doyma hissi zəif olan uşaqlar piylənmə riski ilə üzləşə bilər.

 

"Çeynəmə fəaliyyəti beyinin toxluq hiss etməsinə və yeməyi dayandırmasına imkan verir. Ancaq davamlı olaraq hamar və üyüdülmüş yeməklərlə qidalanan uşaqlarda çeynəmə olmadığı üçün toxluq hissi daha az olur", - deyən həkim bu mövzuda valideynləri diqqətli olmağa çağırıb.