Təəssüf ki, yenə hər kəs təşviş içindədir. Dəfələrlə müxtəlif müsahibələrdə demişəm, yenə deyirəm: yoluxma sayı önəmli deyil, rəqəmlər sizi qorxutmasın. Önəmli olan ağırlaşma sayıdır.

Aztibb.az-ın xəbərinə görə, İstanbul Hospitalın direktoru, həkim-radioloq Aydın Əliyev  son zamanlar ölkəmizdə koronavirusa yoluxmaların sayının artması ilə bağlı fikirlərini bölüşərkən belə söyləyib.

Hazırda aktiv həkim kimi fəaliyyət göstərdiyini deyən A.Əliyev bildirib ki, hər gün boğazı qıcıqlanan, öskürən, qızdırması olan xəstələri müayinə edir və real olaraq görür ki, son mutasiyalarda ağırlaşma sayı azdır:

"Arxayın olun, qorunmayın" demirəm. Əlbəttə, bunlar vacibdir, lakin qorxmayın. Koronavirus getdikcə zəifləyir, ən qısa zamanda pandemiya bitəcək. Buna əmin olun".

Azərbaycanda yoluxma sayının 7000-ə çatmasından danışan həkim qeyd edib ki, hər il dünyada 1 milyard insan qrip virusuna yoluxur, lakin karantin elan edilmir. Ağırlaşan xəstələr müvafiq müalicəni almalıdır. Yüngül xəstələr tezliklə sağalacaq. O2 Saturasiyası 95-dən çoxdursa, ümumiyyətlə narahat olmağa dəyməz.