Ötən ilin noyabr ayında Mərkəzi Gömrük Hospitalında koronavirus diaqnozu ilə müalicə olunan, Əməkdar müəllimə olan 69 yaşlı Sima Tarverdiyeva Aztibb.az-a müsahibəsində müalicəsinin uğurlu nəticələrindən bəhs edib.

Sima xanım bildirib ki, əvvəlcə xəstəxanaya getməyə razı olmasa da, Gömrük Hospitalında qarşılaşdığı mənzərə onun fikirlərini tamamilə dəyişdirib:

“Hospitalın hər bir əməkdaşı məni o qədər mehribanlıq və qayğı ilə qarşıladı ki, sanki burada işləyənlər mənim ailə üzvlərim, doğmalarım idi. Mən bu diqqəti hər saat, hər an hiss edirdim. Artıq xəstəxanada olduğumu unutmuşdum. Belə isti münasibət mənə ruh verdi, tez sağalmağımda böyük rol oynadı”.

Pasiyentin sözlərinə görə, müalicə müddətində baş həkim özü onun səhhəti ilə maraqlanaraq, problemlərinin həllinə şəxsən səy göstərib:

“Mənim ciddi yanaşı xəstəliklərim var idi, bu səbəbdən çox həyəcan keçirirdim. Lakin bütün problemlərə baxmayaraq xəstəliyimə peşəkar yanaşma və düzgün müalicə məni ağırlaşmağa qoymadı, tamamilə sağalıb evə yola salındım”.

S.Tarverdiyeva MGH-də ona göstərilmiş yüksək diqqət və qayğıya, yaradılan şəraitə görə Dövlət Gömrük Komitəsi Tibbi Xidmət İdarəsinin rəisi Ceyhun Məmmədova, Mərkəzi Gömrük Hospitalının baş həkimi Elman Məmmədova, həkim-infeksionist Mədinə Abdullayevaya, eləcə də müalicəsində rolu olan digər həkim və tibb işçilərinə təşəkkürünü ifadə edib.

Sima xanım fikrini bu sözlərlə bitirib: “Arzu edirəm ki, hər yerdə belə işini bilən, peşəsinə vicdanla yanaşan kollektivlər olsun. Onları demək olar ki, hər gün xatırlayır, minnətdarlığımı bildirirəm”.