“Mərkəzi Gömrük Hospitalında koronavirus səbəbindən müalicə aldığım müddətdə mənə yüksək səviyyədə tibbi xidmət göstərilmişdir. Reanimasiya şöbəsində 5 gün ağır vəziyyətdə komada qaldıqdan sonra düzgün və peşəkar müdaxilələr nəticəsində tam şəkildə sağlamlığıma qovuşmuşam”.

Bu sözləri pasiyent Cahangir Kərimov Aztibb.az-a Mərkəzi Gömrük Hospitalında 11 gün ərzində aldığı müalicəylə bağlı təəsüratlarını bölüşərkən deyib.

Dünyanın bir çox ölkələrində olduğunu söyləyən pasiyent Azərbaycanda belə bir yüksək standartlara uyğun tibb mərkəzinin fəaliyyət göstərməsinin sevindirici olduğunu qeyd edib:

“Klinikanın personalı – tibb bacısından tutmuş baş həkimədək hər bir əməkdaşı gün ərzində bir neçə dəfə mənim vəziyyətimlə yaxından maraqlanaraq, lazımi analizləri götürür, müayinə və müalicələri yüksək səviyyədə aparırdılar. Burada müalicə olunduğum müddətdə səhhətimlə maraqlanan hər bir tibb işçisinin peşəkarlığına əmin oldum, onların həkim andına sadiq olduqlarını gördüm”.

O, həmçinin koronavirus əleyhinə peyvəndin 2 dozasını aldığını vurğulayıb.

Pasiyent müalicəsinin uğurla tamamlanması və sağlamlığına qovuşmasında rolu olan həkimlərin hər birinə - klinikanın baş həkim Elman Məmmədov, Reanimasiya şöbəsinin həkimləri – Tural Sadıqov, Mehdi Əliyev, Rəşad Nəsirli, Könül Həsənova, Təranə Göyüşova, Mədinə Abdullayeva, Xəyal Məmmədov, Şahin Mazanov, Sevda Quliyeva, Mirmənsim Məmmədov və digərlərinə dərin  minnətdarlığını ifadə edib.