Hindistan koronavirusa yoluxanların sayına görə Braziliyanı qabaqlayaraq dünyada ikinci yerə yüksəlib.

Aztibb.az pandemiyanın statistikasını aparan "Worldometer" saytına istinadla xəbər verir ki, son sutka ərzində koronavirus infeksiyasının yeni episentrinə çevrilən Hindistanda 91 min 723 nəfər bu xəstəliyə yoluxub. Bu, həm də ölkədə koronavirusa rekord sutkalıq yoluxma halıdır. Həmçinin sentyabrın 6-da ölkədə 1008 nəfər xəstəlik səbəbindən dünyasını dəyişib.

İndiyə qədər ölkədə 4 milyon 204 min 613 yoluxma halı qeydə alınıb, xəstəlik səbəbindən ölənlərin sayı isə 71 min 687 nəfərə çatıb. Hindistan COVID-19 infeksiyası səbəbindən ölənlərin sayına görə dünyada 3-cü yerdədir.

Saytın son məlumatına əsasən, indiyədək dünyada koronavirus infeksiyasına 27 milyon 293 min 825 yoluxma və bu xəstəlik səbəbindən 887 min 557 ölüm faktı qeydə alınıb. Eyni zamanda, 19 milyon 378 min 823 nəfər COVID-19 xəstəliyindən sağalıb, müalicəsi davam edən 7 milyon 27 min 445 xəstədən 59 min 998 nəfərin vəziyyəti ağır qiymətləndirilir.

ABŞ-da COVID-19 infeksiyasına yoluxanların sayı 6 milyon 460 min 250 nəfərə çatıb. Bu göstəriciyə görə Hindistandan sonra üçüncü yeri Braziliya tutur - 4 milyon 137 min nəfər. Rusiyada yoluxanların sayı 1 milyon 25 min 505 nəfərdir. Peruda 689 min 977 nəfər, Kolumbiyada isə 666 min 521 nəfər COVID-19 xəstəliyinə yoluxub.

ABŞ COVID-19 xəstəliyindən ölənlərin sayına görə də lideridir – 193 min 250 nəfər. İlk beşliyə daxil olan Braziliyada ölənlərin sayı 126 min 686 nəfərə çatıb. Ölənlərin sayına görə Hindistandan sonra 4-cü yerdə qərarlaşan Meksikada 67 min 558, Böyük Britaniyada isə 41 min 551 nəfər koronavirus infeksiyası səbəbindən həyatını itirib.