Azərbaycan Qızıl Aypara Cəmiyyəti “Sağlamlığa xidmət” İctimai Birliyi ilə birlikdə sağlamlıqla əlaqədar maarifləndirici tədbirləri həyata keçirilir. Şərqi Avropa və Mərkəzi Asiya ölkələrinin Regional Vərəm Proqramı çərçivəsində vərəm sahəsində fəaliyyət göstərən tibb bacıları üçün “COVID-19 və psixi sağlamlıq” mövzusunda seminar da həmin məqsədlə təşkil edilib.
Cəmiyyətin mətbuat xidmətindən verilən məlumata görə, seminarda hər hansı bir psixoloji narahatlıq zamanı Ümumdünya Səhiyyə Təşkilatının tövsiyələrinə əməl olunmasının vacibliyi və psixi sağlamlığa dair maariflənməsinin əhəmiyyətindən bəhs olunub, iştirakçılarına İlk Psixoloji Yardımın prinsipləri barədə geniş məlumat verilib. Yeni növ koronavirus (COVID-19) pandemiyası zamanı yaşanan hadisələr, eləcə də qlobal epidemiya ilə əlaqədar xəstələrə qulluq, qoruyucu vasitələrdən istifadə, peyvəndləmənin zəruriliyi barədə də müzakirələr aparılıb.
Seminar iştirakçılarına sertifikatlar təqdim edilib.
