Son sutkada İndoneziyada COVID-19 virusuna gündəlik ən çox yoluxma və ölüm halı qeydə alınıb – 3622 yoluxma və həmin xəstəlik nəticəsində 134 ölüm halı.

Hazırda İndoneziya COVID-19-a yoluxma hallarının sayına görə Cənub-Şərqi Asiyada Filippindən sonra ikinci yeri tutur. Sentyabrın 3-nə olan məlumata görə, Filippində COVID-19-a yoluxanların ümumi sayı 228 min 403 nəfərə çatıb. Eyni zamanda, İndoneziyanın yoluxma sayına görə dünyanın 215 ölkəsi arasında 23-cü yeri tutduğu bildirilir.

Ukraynada isə koronavirusa tutulma halları kütləviləşir. Səhiyyə Nazirliyinin məlumatına görə, ölkədə son sutkada 2723 nəfər koronavirusa yoluxub, 51 nəfər isə dünyasını dəyişib. Bundan öncə koronavirusa yoluxma faktı sutkalıq 2495 nəfəri keçməmişdi. Ən çox yoluxma Kiyev, Xarkov, Odessa, Lvov vilayətlərində qeydə alınıb. 

Türkiyədə son sutka ərzində 49 nəfər koronavirus (COVID-19) infeksiyasından dünyasını dəyişib. Bu barədə ölkənin Səhiyyə naziri Fahrettin Koca bildirib. 

Nazirin sözlərinə görə, 1642 yeni yoluxma faktı qeydə alınıb. Pandemiya qurbanlarının sayı 6511, virusa yoluxanlar isə 274 943 nəfərə çatıb.