Mərkəzi Gömrük Hospitalının bütün tibb personalı 11 iyun - 31 avqust tarixinədək gecə-gündüz fərqli şəraitdə çalışaraq COVID-19 virusuna yoluxmuş xəstələri müalicə ediblər. Bu müddət ərzində ixtisasından asılı olmayaraq hər bir həkim və bütün tibb personalı koronavirusla mübarizəyə səfərbər olub. Qeyd edək ki, bu zaman ərzində hospitalda COVID-19 virusuna yoluxmuş xəstələrin müalicəsi ödənişsiz aparılıb.

Mərkəzi Gömrük Hospitalında ən müasir avadanlıqların mövcudluğu xüsusilə ağır COVID-19 xəstələrinə tibbi xidmətlərin göstərilməsinə şərait yaradıb. Məhz bu səbəbdəndir ki, hospitalda ən ağır COVID-19 xəstələri qəbul edilmişdir. Belə xəstələrdə yanaşı xəstəliklərin mövcudluğu təbii olaraq komanda işi tələb edib və hər bir xəstə üzərində çalışan həkim briqadası ən müasir tibbi yeniliklərə əsaslanaraq müalicə işini təşkil edib.

Koronaviruslu xəstələrin müalicə prosesində komandada çalışan hər bir tibb personalının öz rolu olub. Onların  gərgin əməyi sayəsində yüzlərlə COVID-19 xəstəsi sağalaraq doğmalarının yanına qayıda bilib.