Sumqayıt şəhərində koronavirusa yoluxan məktəbli Bakıda xəstəxanada vəfat edib.

Aztibb.az-ın məlumatına görə, Yusif Məmmədəliyev adına Sumqayıt şəhər 31 nömrəli tam orta məktəbin 9 b sinif şagirdi Əsgərov Kamil İslam oğlu oktyabrın 5-də koronavirusa yoluxub. Test nəticəsi müsbət çıxan şagird həmin gündən məktəbə gəlməyib.

Yüksək qızdırma ilə o, oktyabrın 6-da Sumqayıtda xəstəxanaya yerləşdirilib. K.Əsgərov sonradan Bakıda klinikalardan birinə göndərilib. Aparılan müalicə tədbirlərinə baxmayaraq məktəbli xəstəxanada vəfat edib. K.Əsgərovun bununla yanaşı, güclü allergik həssaslığı da olub.

Məktəbdən K.Əsgərovun vəfat etməsi xəbəri təsdiqlənib.

Bildirilib ki, oktyabrın 6-dan məktəblinin təhsil aldığı 9b sinfində əyani tədris dayandırılıb və distant təhsilə keçilib. Həmin sinifdə əyani tədris oktyabrın 20-də bərpa olunacaq.