Yeni növ koronavirus (COVID-19) infeksiyasına yoluxmuş xəstələrin xəstəxanaya yatırılması kriteriyaları pandemiya başlandığı gündən təsdiq olunub. Xəstəxanaya yatış prosesi xəstənin saturasiya səviyyəsi, yanaşı xəstəliklərin mövcudluğu, yaş və digər kriteriyalara görə tənzimlənir. Təcili və təxirəsalınmaz tibbi yardım briqadalarının işi də onun əsasında həyata keçirilir. İstənilən halda, koronavirus xəstələrinin yatış kriteriyalarının yeniləməkdə fayda var. Ona görə də müəyyən dəyişikliklər ediləcəyi planlaşdırılıb.

Aztibb.az xəbər verir ki, bunu Tibbi Ərazi Bölmələrini İdarəetmə Birliyinin (TƏBİB) İdarə Heyətinin sədri vəzifələrini icra edən Vüqar Qurbanov Milli Məclisin Səhiyyə komitəsində keçirilən “Koronavirus infeksiyası (COVID-19) ilə bağlı ölkədəki mövcud vəziyyət, vaksinasiya və görülən digər tədbirlər barədə” dinləmələr zamanı deyib.

V.Qurbanov, həmçinin özəl tibb müəssisələrinin koronavirusla mübarizəyə cəlb edilməsi barədə də danışıb. Bildirib ki, virusa yoluxmuş xəstə sayı artdığı dövrlərdə bir çox özəl tibb müəssisəsi prosesə qoşulmuşdu: “Hazırda özəl tibb müəssisələrinin prosesə cəlb olunmasına ehtiyac yoxdur, çünki dövlət xəstəxanalarındakı mövcud vəziyyət yaxşıdır. Yəni, kifayət qədər yataq ehtiyatımız, boş çarpayılar var. Onu da qeyd edim ki, pandemiya ilə mübarizədə iştirak edən tibb müəssisələrinə cəlb olunan mütəxəssislər əsasən dövlət tibb müəssisələrinın işçiləridir”.