Yüksək yoluxuculuğu ilə fərqlənən koronavirusun “delta” ştamı son bir həftə ərzində coğrafiyasını 192 ölkə və əraziyə qədər genişləndirib. "Alfa", "beta" və "qamma" ştamlarının mövcud olduğu ölkələrin və ərazilərin sayı da artıb. 

Aztibb.az xəbər verir ki, bu barədə Ümumdünya Səhiyyə Təşkilatının (ÜST) həftəlik epidemiya ilə bağlı bülletenində deyilir.

Bülletendə bildirilir ki, “Alfa”, “beta, “qamma” və “delta” ştamları ekspertlər tərəfindən, "narahatlıq doğuran variantlar" kateqoriyasına aid edilib. "SARS-CoV-2 virusunun variantlarının aşkar edilməsi üzrə fəaliyyətin, genomun sıralama qabiliyyətinin genişlənməsi də daxil olmaqla, milli və beynəlxalq səviyyələrdə fəallaşdığına görə, narahatlıq doğuran variantların mövcudluğunu bildirən ölkələrin, bölgələrin və ərazilərin sayı artmaqda davam edir. Vurğulanır ki, “delta” variantının mövcudluğu barədə məlumatlar 192 ölkədən daxil olub, bundan əvvəlki həftə çıxan bülletendə isə söhbət 187 ölkədən gedirdi. “Delta” ştamı 2020-ci ilin oktyabrında Hindistanda aşkar edilib.

İlk olaraq 2020-ci ilin sentyabr ayında Böyük Britaniyada aşkar edilən “alfa” ştamı indi 195 ölkədə və ərazidə mövcuddur (bir həftə əvvəl isə 193 ölkə idi). Ötən ilin avqustunda Cənubi Afrika Respublikasında aşkar edilən "beta" variantı hazırda 145 dövlətdə mövcuddur (artım 3 ölkə). Sentyabr ayında Braziliyada aşkarlanan “qamma” ştamı 99 ölkədə (artım 3 ölkə) mövcuddur.

ÜST-ün oktyabrın 5-nə olan məlumatına görə, pandemiyanın başlanmasından bu günə qədər dünyada 235 175 106 nəfər koronavirusa yoluxub, ölüm hallarının sayı 4 806 841-ə çatıb.