Qədim türk içkilərindən olan və darıdan hazırlanan bozanın insan sağlamlığı üçün müxtəlif faydaları var.

Tarixi min il əvvələ dayanan boza ənənəvi bir türk içkisidir. Hazırda Orta Asiya coğrafiyasının bəzi bölgələrində istehlak edilir. Qış günlərinin əvəzsiz içkisi olan boza Türkiyədə ləbləbi ilə birlikdə təqdim olunur. 

Darı unu, su və şəkərdən hazırlanan bu içkinin tərkibində müxtəlif süd turşusu və maya bakteriyası olur. Bu bakteriyalar probiotik təsir göstərir.

Faydalı bakteriyalar sayəsində immunitet sistemi güclənir, bədənin müqaviməti artır. Bakteriyalar istehlak etdiyimiz qidalarla bədənimizə daxil olan zəhərli, allergen və kanserogen maddələri məhv edir.

Boza həm də enerji verən bir içkidir. Tərkibində zəngin karbohidrat və B vitamini var. Bu səbəbdən kökəlmək istəyənlər, yeniyetmələr, və ağır iş görənlərə tövsiyə edilir.

Boza A, C, E vitaminləri, kalsium, dəmir və fosfor mineralları ilə də zəngindir. Diqqət yetirilməsi lazım olan məqam bozanın etibarlı və gigiyenik şərtlərdə hazırlanmasıdır.

Boza ilə bağlı TÜBİTAK-ın da tədqiqatları var.