Koronavirusun son zamanlar geniş yayılmağa başlamış “Mu” variantı “Delta” variantı qədər yoluxucu və öldürücü gücə malik deyil.

Aztibb.az xəbər verir ki, bu barədə həkim-infeksionist, Azərbaycan Tibb Universitetinin Yoluxucu xəstəliklər kafedrasının müəllimi, tibb üzrə fəlsəfə doktoru Vüqar Cavadzadə bildirib. 

"Heç bir həkim xəstəyə baxıb onun “Mu” və ya başqa varianta yoluxduğunu deyə bilməz. Bunu yalnız molekulyar genetik üsulla müəyyənləşdirmək olar. Lakin hansısa əlamətlərin üstünlük təşkil etməsinə görə zamanla onu ayırd edə bilərik", - deyə həkim vurğulayıb. 

Onun sözlərinə görə, “Delta” variantında daha çox boğaz, baş ağrısı, burun tutulması qeydə alınır. Düzdür, bu əlamətlər klassik COVID-19-da da olur. Sadəcə olaraq, “Delta”da sözügedən əlamətlər daha çox üstünlük təşkil edir.

“Ölkəmizdə “Mu” variantına rast gəlinib-gəlinməməsini laborator nəticələrə əsasən deyə bilərik. Hazırda isə bununla bağlı açıqlama yoxdur. Güman edirəm ki, dünyanın 40 ölkəsində və bizə yaxın ölkələrdə yayılıbsa, gec-tez ölkəmizdə də yayılacaq. Lakin təşvişə düşməyə ehtiyac yoxdur”.