Onun sözlərinə görə, ağır formada koronavirus keçirdikdən sonra, yüksək təzyiq və diabet xəstələrinin çoxunda böyrək problemləri müşahidə olunub. Beynəlxalq Nefrologiya Dərnəyi koronavirus keçirmiş xəstələrdə böyrək problemlərinə dair əsaslı araşdırmalar aparılmasa da, ağır formada COVID-19 xəstələrinin 25-50%də böyrək problemlərinin yarandığı bildirilib.

 

Barat Yusubov qeyd edib ki, müşahidə olunan problemlərdən: sidikdə daha çox protein və qan hüceyrələrinin olması, böyrəklərin filtrasiya funksiyasında zəifləməsi və s.-ni göstərmək olar. Müalicə əsnasında bir çox dərmanların eyni vaxtda qəbul olunması, suyun az içilməsi böyrəklərə mənfi təsir göstərir. Adətən 60 yaşdan yuxarı pasientlərdə yüksək təzyiq, diabet, koronar arteriya xəstəlikləri mövcuddursa, bu, böyrəklərdə keçici problemlərə yol aça bilər.

 

Nefroloq əlavə edib ki, COVID-19-u ağır formada keçirənlərin böyrəklərində qalıcı fəsadların olmasını hər hansı araşdırmayla təsdiqləmək hələ çox tezdir. Lakin böyrəkləri sağlam olan insanlarda da koronavirusdan sonra böyrək xəstəlikləri riski ola bilər. Bu səbəbdən şikayətləriniz olmasa belə böyrək müayinələrini gecikdirməyin.