Səhiyyə Nazirliyinin baş pediatrı Erkin Rəhimov son zamanlar uşaqlarda qızdırma, ishal və qusma hallarının geniş yayılması ilə bağlı olaraq onlara sistem qoşdurulması hallarına tez-tez rast gəlinməsinə münasibət bildirib.
Baş pediatr bu barədə Aztibb.az-a açıqlamasında uşaqlara sistemlərin yalnız xəstəxana şəraitində vurulmalı olduğunu deyib. Bildirib ki, sistemlərin həkim məsləhəti olmadan, ev şəraitində edilməsi bəzən ciddi fəsadlara səbəb ola bilər:
“Uşaqlara ev şəraitində sistem qoşulduğu zaman hər hansı bir əlavə reaksiya, yan təsir və ya anafilaktik şok baş verərsə, burada ona qarşı tədbir görmək üçün şərait mövcud deyil. Ev şəraitində edilən sistemlər bəzən uşaq ölümlərinə belə səbəb ola bilər. Bu baxımdan valideynləri ev şəraitində sistem qoşdurmaqdan çəkinməyə çağırıram”.
Həkimin sözlərinə görə, hazırda uşaqlar arasında qusma, ishal, qızdırma halları geniş yayılıb. Bu zaman uşaqlara ağızdan dərmanların qəbulunu, bol maye verilməsini tövsiyə edirik. Lakin bəzən qusmaya bağlı dərmanların qəbulu mümkün olmadıqda uşaqlara sistemlərin xəstəxana şəraitində köçürülməsi tələb oluna bilər.
“Çalışmaq lazımdır ki, uşaqlarda sadə tərkibli, Natrium xloridli, içərisinə qlükoza qatılmış sistemlərdən istifadə olunsun”, - deyə E.Rəhimov qeyd edib.