Medipol Mega Universiteti dünyada yayılması gündən-günə artan qaraciyər piylənməsi xəstəliyinin simptomları ilə bağlı mühüm açıqlamalar verib.

Aztibb.az xəbər verir ki, açıqlamada tərkibində bir çox qatqılar əlavə edilmiş yarımfabrikat qidaların, “fast food” yeməklərinin, spirtli içkilərin, hərəkətsizlik, yaşayış mühiti və yaxud çalışdığınız işin qaraciyərin piylənməsinə səbəb olduğu bildirilir.

Əksər hallarda bu xəstəlik heç bir şikayətin olmadığı halda, təsadüfən ortaya çıxır. Qan testləri və ya ultrasəs müayinəsi, MRT və ya bəzi cərrahi əməliyyatlar zamanı aşkar edilir.

Piylənmə artıqca qaraciyərin iltihablanmasına və sərtləşməsinə səbəb olur. Əvvəlcə yorğunluq və halsızlıq özünü göstərir. Daha sonra hepatit, qaraciyərin sirrozu və xərçəngi kimi xəstəliklər inkişaf edə bilir.

Yüksək xolesterol və diabet xəstələrinin təxminən 80 %-i qaraciyər piylənməsindən əziyyət çəkir və hər 3 nəfərdən birində bu xəstəliyə rast gəlinir. Bu səbəbdən risk altında olanlar qan testləri və radioloji üsullarla yoxlanılmalıdırlar.

Piylənmənin aşkarlanması üçün ultrasəs müayinəsi ən sürətli və praktik üsuldur. Lakin qaraciyərin sərtlik dərəcəsini ölçən elastoqrafiya və ya fibroskan adlandırdığımız çoxfunksiyalı cihazlar da qaraciyərin müayinəsi üçün daha effektivdir.   

Xəstəliyin müalicəsi uzunmüddətli aparılır. Bəzi qida məhsullarından tam və ya qismən imtina etmək göstərişi verilir.

Qaraciyər piylənmsi diaqnozu qoyulan insanlara xüsusi pəhriz və idman proqramı təyin olunur. Dərman preparatları ilə müalicə ilk günlər intensiv, sonra isə aylarla passiv formada aparılır.  

Xəstə karbohidratla zəngin məhsulları, doymuş yağ ehtiva edən qidaları azaltmalı, pəhrizə keçməli, axşam saat 19:00-dan sonra yeməyi dayandırmalı və gündə ən azı yarım saat piyada gəzməlidir.