Koronavirusun verdiyi neyropatiya təkcə iy və dadbilmə hissiyyatının itməsi deyil. Güclü tərləmə də tər vəzilərini tənzimləyən avtonom sinir sisteminin funksiya pozulmasıdır. Təkcə baş nahiyəsi tərləyirsə çox güman ki, bu, vitamin D çatışmazlığına görədir.

 

Həkimin sözlərinə görə, ümumi bədənin profuz tərləməsi avtonom sinir sisteminin neyropatiyasının nəticəsidir və bir müddətə öz-özünə bərpa olacaq. Müalicəsi üçün isə xüsusi dərmana ehtiyac yoxdur.

 

Şahin Məmmədov qeyd edib ki, güclü tərləmənin mənfi cəhəti çoxlu su itkisidir. Tərin tərkibində həm Na, həm su vardır. Güclü tərləmədə su natriumdan daha çox itirildiyi üçün nəticədə hipernatriemiya yaranır. Bol maye qəbul edərək dehidratasiyanı aradan qaldırmaq lazımdır.

 

O, tərləmənin müsbət tərəfinin də olduğunu bildirib.  Əlavə edib ki, tər vasitəsilə həm toksinlər bədəndən xaric olunur (dəri böyrəklər kimi həm də ifrazat orqanıdır), həm də tərin tərkibində azot oksidi mövcuddur ki, bu da bakteriosid və virus əleyhinə təsirə malikdir, xəstəni əlavə infeksiyalardan qoruyur.