Aztibb.az xəbər verir ki, tanınmış həkim-reanimatoloq Şahin Məmmədov koronavirusdan necə sağaldığına dair sosial şəbəkədə məlumat paylaşıb.

 

Həkim müalicə müddətində heç bir antibiotik və ya sistemdən istifadə etmədiyini deyib:

 

"Mən 6 ay qabaq vaksin olunmuşdum, lakin ailə üzvlərim vaksinsiz idilər və hər birində də test pozitiv idi. Onlar da demək olar ki, dərmansız və təbii vasitələrlə sağaldılar.

 

Əgər mütləq dərman qəbul etmək istəyirsinizsə, əks göstəriş yoxdursa, virus əleyhinə arbidol ya favipiravirdən birini seçə bilərsiniz. İkisinin də koronavirusa heç bir xeyri yoxdur. Sadəcə, bu virus qriplə yanaşı gedə bilər deyə, qeyd olunan preparatlar bəzən qripin müalicəsi üçün lazım ola bilər".

 

Həkim, həmçinin yaşı 40-dan yuxarı olanlara göbək ətrafına kleksan 0.4 iynəsinin gündə 1 dəfə vurulmasını məsləhət görüb.

 

O, əlavə edib ki, xəstələrin vəziyyətini pisləşdirən vaxtından əvvəl, ehtiyac olmadan təyin olunmuş lazımsız dərmanlardır: "Dərman zəhərin müalicəvi dozasına deyilir. Bütün dərmanlar zəhərdir. Qorxu və panikadan güclü dərmanları bədəninizə vurduqda, orqanizmə virusla mübarizə aparmaqda mane olursunuz".