İsraildə aparılan və uzun zamandır bitməsini gözlədiyim elmi tədqiqatın ilkin nəticələri artıq hazırdır. Bu tədqiqatın nəticəsi pandemiya dönəmində virusla mübarizənin elmi əsaslı olmasının vacibliyini bir daha özündə əks etdirir. Bu tədqiqatda ilk dəfə olaraq virusa yoluxub sağalanlarla "BionTech/Pfizer" peyvəndini vurduranlar müqayisə edilib. Nəticəyə görə 6-8 ay öncə sadəcə peyvənd alanlarda delta variantına yoluxma riski xəstəliyə tutulub sağalanlarla müqayisədə 13 dəfə çoxdur.

Aztibb.az xəbər verir ki, bu barədə Almaniya-Azərbaycan Radioloji və Neyroradioloji Cəmiyyətinin sədri, Köln Universiteti Klinikasının şöbə müdiri, tibb elmləri doktoru Nuran Abdullayev məlumat verib.

N.Abdullayev bildirib ki, tədqiqatın digər önəmli nəticəsi odur ki, xəstəliyə yoluxub sağalanlara tətbiq edilən "BionTech/Pfizer" peyvəndindən sonra yüksək qoruyuculuq müşahidə edilib: "Təəssüf ki, peyvənd vurduranlar arasında xəstəliyə yoluxduqdan sonra ağır kliniki gedişatlara da rast gəlinib".