Düzdür, ölkəmizdə karantin qaydaları yumşaldıqdan, ictimai iaşə obyektləri açıldıqdan sonra insanlar bir qədər arxayınlaşdılar. Çox vaxt ictimai nəqliyyatda, ticarət və ictimai iaşə obyektlərində insanların maskadan düzgün istifadə etməməsinin şahidi oluruq. Yəqin ki, hamınız rast gəlmisiniz, - maskanı ya çənə üstündə saxlayırlar, ya biləkdə gəzdirirlər. Maska ağız və buruna virusun daxil olmaması üçündür, o, çənəni və biləyi qorumaq üçün nəzərdə tutulmayıb. Bütün bunlar koronavirusun yayılması üçün əlverişli şərait yaradır.

 

Xəstəliyə yoluxmaq çox asandır, sağalmaq çətin. Maskalardan cəriməyə düşməmək üçün deyil, qorunmaq üçün düzgün istifadə edin. Sağlamlığınızı qoruyun, çünki, heç bir cərimədən qaçma, heç bir qadağaya məhəl qoymama sizə dünyanın ən şirin neməti olan can sağlığınızı qaytara bilməyəcək. Pandemiya dövründən çıxmağın yeganə yolu vaksinasiyadır. Bunu artıq bütün dünyada insanlar dərk etməyə başlamış, könüllü surətdə peyvənd vurduranların sayı artmışdır.

 

Statistikaya nəzər salsaq, Azərbaycanda vaksinasiya olunanların sayı 6 milyonu keçib. Vaksinasiyanın sürətlə davam etdiyini nəzərə alsaq, bu, 10 milyondan artıq əhalisi olan bir ölkə üçün çox yaxşı göstəricidir.

 

Onu da qeyd edim ki, hazırda yoluxanların 90%-i peyvənd olunmayanlardır. Pandemiya başladığı gündən bu günə qədər tək Azərbaycanda deyil, bütün dünyada koronavirusa hər kəsin yoluxması gözləniləndir, heç kim bu xəstəlikdən sığortalanmayıb - nə təkrar xəstələnməkdən sonra, nə də peyvənddən sonra. Buna görə də hər kəs öz orqanizmini buna qarşı hazırlamalı və immun sistemini möhkəmləndirməyə çalışmalıdır.

 

Bəzi insanlar peyvənddən qaçır, bunu yaşlı olmaları və ya yanaşı xəstəliklərinin olması ilə əlaqələndirirlər. Lakin bütün dünyada həkimlər həm yaşlı, həm də risk qrupuna daxil olan - yanaşı xəstəlikləri olan insanlara vaksinasiyadan keçməyi tövsiyə edir. Bir həkim kimi hamıya vaksinasiya olunmağı və gigiyena qaydalarına tam riayət etməyi tövsiyə edirəm.

 

Bir daha xatırlatmaq istəyirəm ki, COVID-19-dan sağalmış sağlam insanlar da yenidən virusa yoluxa və onu yaya bilərlər. Ona görə də təhlükəsizlik qaydaları, hər şeydən əvvəl maskalardan istifadə, gigiyena qaydalarına ciddi riayət edilməsi və sosial məsafənin saxlanması həm vaksinasiyadan əvvəl, həm də ondan sonra gözlənilməlidir.