“Hazırki yoluxma dinamikasını analiz etsək görərik ki, artım trendi müşahidə olunmaqdadır. Bu səbəbdən bir tərəfdən vaksinasiya prosesi sürətləndirilməli, digər tərəfdən maarifləndirmə işləri daha da genişləndirilməlidir. Hazırki sanitar epidemioloji vəziyyəti nisbi nəzarət altındadır. Amma yoluxma sayı bu templə davam edərsə bizi ciddi problemlər gözləyə bilər. Bununla yanaşı, pandemiyanın ilk dövrlərindəki hazırlıq səviyyəsi ilə indiki hazırlıq səviyyəsi eyni deyil. Hazırda COVID-19-la mübarizəyə daha hazırlıqlıyıq”.

Bu barədə Aztibb.az-a açıqlamasında həkim-infeksionist Fərrux Sədirov məlumat verib.

Onun sözlərinə görə, artıq bütün dünyada dominat yoluxdurucu virus kimi delta ştamı qəbul edilib.

“Yoluxmanın tormozlayıcı faktorları arasında ən güclüsü vaksinasiyadır. Ümid edirəm ki, vaksinasiya sürətimizi yoluxma sürətinə çatdırıb bu zənciri qıra biləcəyik”, - deyə həkim bildirib.  

Vaksinasiya olunanlar arasında ölüm hallarına demək olar ki, rast gəlinmədiyini vurğulayan F.Sədirov iki doza vaksini tamamlamış və son vaksindən 2 həftə vaxt keçmiş şəxslər arasında ölüm halı qeydə alınmadığını diqqətə çatdırıb. Əlavə edib ki, ikinci doza vaksindən 3-5 gün keçdikdən sonra yoluxanlara rast gəlinsə də, onlar xəstəliyi yüngül keçirirlər: “Ümumilikdə, ölüm faizində azalma müşahidə olunmasa da, vaksinasiya olunmayanlar arasında ölüm faizi eyni olaraq davam edir”.