Son günlər ölkədə yeni növ koronavirus (COVID-19) infeksiyasına yoluxanların sayında kəskin artım müşahidə edilir. Paytaxt Bakı şəhərində vətəndaşların koronavirusdan qorunması və infeksiyanın yayılmasının qarşısının alınması məqsədilə genişmiqyaslı kompleks tədbirlər həyata keçirilir.

Bakı Şəhər İcra Hakimiyyətinin (BŞİH) mətbuat xidmətindən verilən məlumata görə, əhali arasında virus əleyhinə vaksinasiya tədbirlərinin səviyyəsinin monitorinqi və vəziyyətin yerində öyrənilməsi məqsədi ilə Bakı Şəhər İcra Hakimiyyəti və Bakı Şəhər Baş Polis İdarəsi ilə birgə yaşayış məhəllələrində, komplekslərində və həyətlərdə reydlərə başlanılıb.

Reydlər zamanı nümayəndələr sakinlərlə görüşür və mənzillərdə fərdi söhbətlər aparırlar. COVID-19 infeksiyasının yayılmasının qarşısının alınması məqsədilə vətəndaşlara virus əleyhinə vaksinasiya olunmağın vacibliyi izah edilir.

İlkin müşahidələrə görə, bəzi vətəndaşlar arxayınlaşaraq vaksinasiya məsələlərinə laqeyd yanaşır və maarifləndirmə işləri hər yerdə lazımi səviyyədə deyil. Ona görə də belə ərazilərə kömək məqsədi ilə məsul əməkdaşlar təyin edilib. Bakı Şəhər İcra Hakimiyyəti bir sıra paytaxt rayonlarının başçılarına iradlar bildirib, vətəndaşlarla maarifləndirmə və fərdi söhbətlərin aparılması işlərinin gücləndirilməsi ilə bağlı tapşırıqlar verilib.

“Koronavirus pandemiyası ilə mübarizə millətin təhlükəsizliyi məsələsidir. Pandemiyadan xilas olmaq məqsədilə vətəndaşlar ilk növbədə vaksinasiya olunmalı, özlərini və ətrafdakılar qorumaq, xəstəliyin daha çox yayılmasına əngəl olmaq üçün tibbi-profilaktik qaydalara ciddi riayət etməlidirlər”, - deyə məlumatda bildirilib.