Özbəkistanda COVID-19 və digər virusları məhv edən cihaz hazırlanıb.
Aztibb.az nuz.uz-a istinadən xəbər verir ki, Daşkənddəki Dövlət Sanitar-Epidemiologiya Nəzarəti Mərkəzində cihazın təqdimatı keçirilib.
Cihazın müəllifi, mühəndis Olim Yusupov bildirib ki, bu texnologiya COVID-19 və başqa yoluxucu xəstəliklərin müalicəsində həlledici rol oynaya bilər. “BioGenetik” adlanan cihaz hava məkanını müxtəlif bakteriyalardan, əsasən də koronavirusdan təmizləmək gücünə malikdir.
“Aparatın havaya buraxdığı elektronlar virusları, bakteriyaları və mikrobları taparaq zərərsizləşdirir. Bu cihaz vərəm, hepatit, COVID-19 və digər yoluxucu xəstəliklərin profilaktikasında və müalicəsində çox faydalıdır”, - deyə o əlavə edib.
Hazırda bu texnologiya Özbəkistanın test qəbulu məntəqələrində, laboratoriyalarda, dövlət və tibb müəssisələrində istifadə olunur.
