Kasnı bitkisi xalq təbabətində geniş istifadə olunur. Kasnının tərkibi insulinəbənzər maddələrlə zəngindir, qanda şəkərin səviyyəsini tənzimləyir, qaraciyər hüceyrələrini yeniləyir, yüksəlmiş xolesterini salır, qaraciyər mənşəli köpməni aradan qaldırır.

 

Aztibb.az xəbər verir ki, kasnı mədəaltı vəz iltihabında istifadə olunan və geniş təsir spektrinə malik nadir bitkilərdən biridir, həm qaraciyər, həm mədəaltı vəz xəstəliklərində köklərinin dəmləməsi içilir. Kasnı şəkər xəstələri üçün faydalı olmaqla yanaşı, yüngül işlədici təsir göstərir, bununla da qəbizlik və babasil zamanı şəfalı olur. İmmuniteti yüksəldir, xroniki bronxit və bədəndə gedən bütün iltihabi xəstəliklər üçün faydalıdır.

 

Kasnı Azərbaycanın hər tərəfində bitən bir bitkidir. İstifadə qaydası belədir: 1 çay qaşığı kasnı kökü 1 stəkan suda 10 dəqiqə dəmlənir, dəmləmə ilıq olanda süzülür, ona 1 çay qaşığı bal və 1 çay qaşığı limon şirəsi əlavə olunur. Gündə 3 dəfə yeməkdən əvvəl ilıq halda içilir. Kasnı köklərini yığın, qurudun, sonra tavada qovurun və üyüdün, çox dadlı və faydalı bir qəhvə əldə etmiş olacaqsınız.