İsrailin elm adamları ilk dəfə koronavirusa qarşı kapsul şəklində vaksin hazırlayıblar.

Aztibb.az İNTERFAX-a istinadən xəbər verir ki, bu barədə “Oramed Pharmaceutical” şirkətinin rəhbəri Nadav Kidron bildirib. O, müvafiq sənədləşmədən və Səhiyyə Nazirliyinin təsdiqindən sonra “Oravax Medical” törəmə müəssisəsi tərəfindən yaxın həftələrdə Təl-Əvivdəki Sourasky Tibb Mərkəzində klinik sınaqlara başlanacağını deyib. 6 həftə davam edəcək sınaqlarda iştirak edəcək 24 könüllünün yarısı bir, digər yarısı isə iki kapsul qəbul edəcək. Könüllülər daha əvvəl peyvəndlənməmiş şəxslər olacaq.

Şirkət rəhbərinin sözlərinə görə, yeni vaksin COVID-19-un variantlarına qarşı da təsirlidir.

Qeyd edək ki, sözügedən vaksinin hazırlanması ilə bağlı bu ilin mart ayında “Oramed” ilə Hindistanın “Premas Biotech” şirkətinin birgə müəssisə yaradacağı elan edilmişdi.