İngiltərədə nəşr edilən "Mirror" qəzeti hər iki doza peyvənd vurdurmuş insanlar haqqında yeni  araşdırma yayımlayıb.

Aztibb.az medimagazin.com.tr-yə istinadla xəbər verir ki, tədqiqatda peyvəndlərin COVID-19 səbəbindən ölümlərin, virusun digər insana keçməsinin və xəstəxanaya yerləşdirilmələrin qarşısını aldığı vurğulanıb.

Araşdırmada peyvəndin hər iki dozasını vurdurmuş şəxslərin COVID-19-a yoluxa biləcəyi də qeyd olunub.

"ZOE Covid Symptom" tədqiqatı çərçivəsində, virusa yoluxanların əsas simptomlardan fərqli simptomlarla qarşılaşdıqları bildirilib.

Araşdırmada epidemiyanın başlanğıcından bəri COVID-19-a yoluxmuş insanların yüksək hərarət, davamlı öskürək, qoxu və dad itkisi ilə qarşılaşdıqları xatırladılıb. Ancaq İngiltərədə peyvənd edildikdən sonra COVID-19-a yoluxanların baş ağrısı, burun axıntısı, asqırma və boğaz ağrısı kimi simptomlarla qarşılaşdıqları qeyd olunub.

"Ümumilikdə, peyvənd olunmuş və olunmamış insanlar tərəfindən COVID-19-un oxşar simptomlarına rast gəlinir", - deyən tədqiqatçılar ən azı bir doza peyvənd vurduran insanlarda isə qısa müddət ərzində daha az simptom müşahidə olunduğunu vurğulayıblar: "Bu, daha az ağır xəstə olduqlarını və daha tez sağaldıqlarını göstərir".