Mərakeş öz ehtiyacını təmin etmək məqsədilə yaxın günlərdə koronavirus əleyhinə vaksinin istehsalına başlayacaq.

Aztibb.az xəbər verir ki, ölkə kralı VI Məhəmməd bu günlərdə COVID-19 və digər xəstəliklər əleyhinə vaksinin Mərakeşdə istehsalı üzrə layihə barədə saziş imzalayıb. Layihə Mərakeşdə COVID-19 əleyhinə vaksinin və digər vaksinlərin istehsalı üçün krallığın tam və inteqrasiyalı sənaye və biotexnoloji potensialın təminatına və müəyyən vaksin suverenliyinə nail olunmasına istiqamətlənib. Layihə, həmçinin Mərakeşin Afrika qitəsində və dünya miqyasında aparıcı biotexnoloji platformaya çevrilməsinə hədəflənib.

COVID-19 və digər xəstəliklər əleyhinə vaksinin Mərakeşdə istehsalı üzrə layihə dövlət-özəl sektor əməkdaşlığı nəticəsində qısamüddətli perspektivdə istehsal gücü ayda 5 milyon doza vaksinə bərabər olmaqla dövriyyəyə buraxılıb. Layihənin ortamüddətli perspektivdə istehsalı tədricən artırılacaq. Beləliklə, layihəyə təqribən 500 milyon dollar həcmində qlobal investisiya cəlb ediləcək. Bu, həm Mərakeşin özünü tam təmin etməsinə, həm də digər Afrika ölkələrinə kömək etməsinə şərait yaradacaq.

Ölkənin Milli Səhiyyə Federasiyasının prezidenti və koronavirusa qarşı vaksinləmə üzrə elmi komitənin üzvü Mulay Səid Əfifin sözlərinə görə, Mərakeşdə dərman preparatlarına ehtiyacın 65 faizi yerli istehsal hesabına təmin edilir. Mərakeşin gördüyü fəal tədbirlər krallıqda koronavirusun yayılmasının qarşısını daha az itki ilə almağa imkan verib.