Yüksək qızdırma, halsızlıq, yuxu istəyi, ürək bulanması və baş ağrısı kimi simptomlarla özünü göstərən gün vurması daha çox uşaqlarda olur.

Aztibb.az xəbər verir ki, uşaqlar böyüklərlə müqayisədə daha az tərlədikləri üçün bədənlərini böyüklər qədər soyuda bilmirlər.

Bu günlərdə gün vurması xüsusilə kiçik uşaqların sağlamlığını təhdid edən vəziyyətlərə yol aça bilər. Yüksək temperaturda uzun müddət günəş altında qalmaq, bədən istiliyinin anormal dərəcədə yüksək olması səbəbindən qalıcı zərərlərə və hətta ölümə səbəb ola bilər.

 Nələrə diqqət etməli? 

• Uşaqlarınızı 10:00-16:00 arasında açıq hava fəaliyyətlərindən və məşqlərdən uzaq tutun.
• Baş nahiyəsini qorumaq üçün enli başlıq və günəş eynəyi taxın.      
• Günəşdən qorunmaq üçün çadır və çətir əvəzinə ağac kölgəsinə üstünlük verin.         
• Hər fürsətdə uşaqlara su içirdin, onların susamasını və ya istəməsini gözləməyin.         
• Tez-tez duş qəbul etmələri məsləhətdir.
• Uşaqları avtomobildə gözlətməyin. Avtomobil içərisindəki istilik bir saat içində həyati təhlükə yarada bilər.         
• Pambıq və açıq rəngli paltarlara üstünlük verin. 
• Halsızlıq əlaməti hiss etdikdə təcili yardım çağırın. 

Günəş vurmasından şübhələnildiyi təqdirdə, əvvəlcə uşağı sərin və kölgəli bir yerə aparmalı, başını, qoltuğunu soyuq su ilə nəmləndirməli, qusma halı baş verdikdə isə yan tərəfi üstə uzandırmalı və təcili tibbi yardım çağırılmalıdır.