Bu günlərdə Bakı və Abşeron yarımadasında toz dumanı müşahidə olunur. Bakı şəhərində havada dispers toz hissəciklərinin konsentrasiyasının sanitar normadan 5,1 dəfə yüksək olduğu qeydə alınıb.

Aztibb.az xəbər verir ki, meteroloqlar belə tozlu havanın bir neçə gün davam edəcəyini bildirirlər.

Bəs tozlu hava səhhətimizə necə təsir edir?

Araşdırmalara görə, hər hansı səbəbdən havanın tərkibi dəyişərsə, havanın zəhərlənməsinə gətirib çıxarır. Havada karbon qazının miqdarının artması isə insanlarda xəstəliklər törədir.

Adətən yayda belə təbiət hadisəsi tez-tez baş verdiyindən toz qatının mənşəyi ilə bağlı məlumat diqqətdən kənarda qalır.

Tozun tərkibində müxtəlif canlı mikroorqanizmlər vardır ki, onlar, orqanizmə düşdükdən sonra fəaliyyətini davam etdirib, zəhərli maddələr istehsal edirlər.

Toz hissəcikləri tənəffüs yollarına çökür və nəticədə müxtəlif maddələr insan orqanizminə daxil olur. Zəif immunitetli və tənəffüs yollarında problemi olan insanlara toz daha pis təsir göstərir.

Müxtəlif allergiyalar, bronxial astma, böyrək, mədəaltı vəzi, ürək və tənəffüs orqanlarının xəstəlikləri tozun səbəb olduğu ən əsas xəstəliklərdir. Toz xroniki xəstəliklərin ağırlaşmasına və yeni patoloji prosesslərin baş verməsinə, hətta ağciyər xərçənginin yaranmasına belə gətirib çıxara bilir.

Belə havada mütləq eynəkdən və maskadan istifadə edilməlidir. Çünki tozlu hava göz kataraktası olan xəstələrə də təsirsiz ötüşmür.

Bu cür hava insanların əsəb sisteminə də təsir edir, psixoloji problemlər yaradır və stressə səbəb olur. Xüsusilə meteohəssas insanlar əziyyət çəkir.

Belə havada gündəlik olaraq evlərdə təmizliyə diqqət yetirilməlidir. Toz qonan səthlər nəm dəsmalla silinməli, xalça və yumuşaq mebellər tozsoranla təmizlənməlidir.