İlon Maskın xəstəliyi xəbəri ilə gündəmə gələn Asperger Sindromu autizmin bir forması olaraq psixi pozğunluq kimi təyin edilir.
Aztibb.az xəbər verir ki, mütəxəssislər xəstəliyin 4-11 yaş arası oğlan uşaqlarında tutulma riskinin daha yüksək olduğunu və müalicəsinin xüsusi təhsil metodu ilə mümkün olduğunu bildirirlər. Bu sindromlu insanlar normal və yüksək intelektə malik olsalar da, onların sosial qabiliyyətləri və vərdişləri zəif inkişaf etmiş olur.
Autistik psixopatiya halı olan bu xəstəlik ilk dəfə ingilis psixiatrı Lorna Uinq tərəfindən Avstriyalı psixiatır və pediatr Hans Aspergerin şərəfinə Asperger sindromu adlandırılıb.
Asperger sindromunu autizmdən fərqləndirən əsas xüsusiyyət, bu sindromda autizmdə olduğu kimi nitqdə və zehni inkişafda heç bir gecikmə və ya geriləmənin olmamasıdır. Çox vaxt məhdud və ya üstün zehni bacarıqlara sahib olan insanlar Asperger sindromlu olurlar. Bəzən onlar sosial kommunukasiyada çətinlik yaşasalar da hər hansı bir elmi sahədə daha üstün zəkalı olurlar.
Qeyd edək ki, “Tesla” və “SpaceX” şirkətlərinin rəhbəri İlon Mask NBC telekanalında, aparıcısı olduğu verilişdə Asperger sindromundan əziyyət çəkdiyini bildirib.